Francina Martin, assistent-sjef by Guardian Peak restaurant, het hierdie heerlike potbrood gebak in die splinternuwe kleioond wat Pasella se selfdoenghoeroe Karin Cronje gebou het. Maar vrees nie, jy kan dit in jou oond by die huis ook doen.

(Bedien 4-6)

500 g koekmeel
7 g (1 pakkie) droë kitsgis
1 e sout
1 t suiker
3 kardamompeule, fyn gekap
3 e olie
1 blikkie geroomde mielies
200 ml lou warmwater

Meng al die droë bestanddele saam. Voeg die olie en mielies by. Voeg eers helfte van die water by en roer tot alles gemeng is. Die mengsel moet lyk soos groot broodkrummels. Voeg die res van die water by net indien nodig. Strooi ‘n skoon oppervlak met ‘n bietjie meel en knie jou deeg daarop vir so 5-7 minute. Maak ‘n bal. Smeer ‘n skoon bak uit met olie en plaas jou deeg daarin. Laat dit vir 20 minute op ‘n warm plek totdat dit verdubbel het in grootte. Haal uit en knie af. Plaas in ‘n broodpannetjie en laat dit weer verdubbel voordat jy dit bak teen 180?C vir 20-30 minute.