Die eerste ding waaraan mens dink wanneer iemand 'lente' sê, is sekerlik blomme. Maar, ons kan ook net soveel duur blommerangskikkings in een huis bekostig. Pasella se gasaanbieder, Christi Panagio, se raad vir 'n goedkoperuitweg is papierblomme. Dis nie net mooi nie, maar ook spotgoedkoop en hou vir ewig.

Jy benodig:
Gekleurde papier
Skêr
Alkantkleefband of gom

Begin deur ses ewe groot vierkante uit die karton te sny. Die grootte van die vierkante sal die grootte van jou blomme bepaal. Onthou ook dat die dikte van die karton die sterkte van die gom sal bepaal, indien jy nie kleefband gaan gebruik nie. Nou begin die vouwerk. Elkeen van die ses vierkantjies gaan een van die papierblom se blare vorm.

Die vouproses is so bietjie tegnies, so hou mooi kop en volg stap-vir-stap: Neem een van die vierkante en vou twee ooreenstemmende punte na mekaar toe om 'n driehoek te vorm. Daarna neem jy die onderste linkerpunt van die driehoek en vou dit na die boonste middelpunt van die driehoek, en so ook met die regterpunt. Jy behoort nou weer 'n kleiner vierkantige vormpie te hê. Druk die vierkantjie mooi plat om seker te maak dat al die sye en punte presies opmekaar lê.

Daar behoort nou ? ‘vlerkie’ aan die linker- en regterkant van die driehoekie te wees. Trek nou albei vlerkies oor en druk dit dan plat op die vierkant sodat dit amper soos twee vlieërs aan albei kante lyk.

Draai nou die vierkantjie om en knip die twee driehoekies wat uitsteek (bokant van die vlieërs) af en draai weer die vierkantjie om. Vou die onderste driehoek van die 'halwe' vlieërs oor sodat jy weer 'n vierkantjie het. Vou nou die vierkantjie dubbel, sodat jy weer 'n driehoek het en plak die linker- en regterkante aanmekaar vas sodat dit nie weer kan oopvou nie. Jy behoort nou jou eerste blaartjie te hê.

Herhaal die proses met die res van die vierkante totdat jy ses blare gemaak het. Plak daarna al ses blaartjies met die alkantkleefband aanmekaar om jou blommetjie te vorm. Ryg dit aan 'n paar droë takkies, tou of selfs deur 'n strooitjie vir 'n bietjie kleur in jou huis.

Kliek hier om die video te speel