"Met hierdie resep kombineer jy sommer jou koffie en nagereg na ete. Jy kan ook bietjie brandewyn of koffielikeur byvoeg indien verkies."

250g witsjokolade

3 e warm espresso

3 e warm melk

1 t vanielje-ekstrak

3 eiers, geskei

2 e strooisuiker

¾ k room, geklop tot op sagtepuntstadium

Meng die sjokolade, koffie en melk en roer aanhoudend om die sjokolade te smelt. Voeg die vanielje-ekstrak en eiergele by en klop met 'n houtlepel tot gemeng. Klits die eierwitte tot sagtepuntstadium en sprinkel die strooisuiker oor. Klits nou tot die mengsel dik en glad is. Vou die eierwitmengsel versigtig lepel vir lepel by die sjokolademengsel in. Vou die geklopte room ook in. Skep in individuele glasies en bedek met kleefplastiek en plaas in die yskas vir ten minste 2 ure voor dit bedien word.

(Om die latte-effek te skep, hou 'n ¼ van die moussemengsel oor. Sprinkel een teelepel gelatien oor 30ml espresso en verhit sodat die gelatien kan spons. Klits dit nou in die moussemengsel in en gooi oor die latte-lagie sodra dit gestol het.)

Versier soos verkies met witsjokolade skaafsels, versiersuiker of bietjie gesifte kakao.